കഥ

കൊല്ലം ജില്ലാ ആശുപത്രിയിലെ പാവപ്പെട്ട രോഗികൾക്കും അവരുടെ കൂട്ടിരിപ്പുകാർക്കും സൗജന്യ ഭക്ഷണം നൽകികൊണ്ട് 1994ലാണ് സാർവ്വത്രിക സാഹോദര്യ സമിതി സേവന പ്രവർത്തനങ്ങൾക്ക് ആരംഭം കുറിച്ചത്. ദിവസവും 500 ഓളം പേർക്ക് ഉച്ചഭക്ഷണം നൽകിയിരുന്ന സൗജന്യ അന്നദാന പദ്ധതി 2020 മാർച്ചിൽ ലോക്ക് ഡൌൺ ആരംഭിക്കുന്നതുവരെ തുടർന്നു വന്നിരുന്നു. ഞങ്ങളുടെ സൗജന്യ അന്നദാന പദ്ധതി പാവപ്പെട്ട രോഗികൾക്ക് ഉപകാര പ്രദമായതിനെ തുടർന്നും ആശുപത്രിയിൽ നിന്നും ഡിസ്ചാർജ് ചെയ്യപ്പെടുന്ന രോഗികൾക്ക് താമസ സ്ഥലമോ വീടോ ഇല്ലാത്ത സാഹചര്യം മനസിലാക്കി കൊല്ലം ജില്ലയിലെ മയ്യനാട് പഞ്ചായത്തിൽ എസ് എസ് സമിതി അഭയകേന്ദ്രം 7 അന്തേവാസികളുമായി 15.08.1998ൽ പ്രവർത്തനം ആരംഭിച്ചു.

കൊട്ടിയത്തിനടുത്തുള്ള ഒറ്റപ്ലാമൂട്ടിൽ ഞങ്ങൾക്ക് ഒരു കാർഷിക-മൃഗ ഫാമുണ്ട്. കൃഷി കൂടാതെ കന്നുകാലികൾ, ആട്, കോഴി, താറാവ്, മുയൽ തുടങ്ങിയവയെ ഞങ്ങൾ വളർത്തുന്നു. തെരുവിൽ അലഞ്ഞ് തിരിയുന്ന ഭൂരിഭാഗം ആളുകളും മാനസിക വൈകല്യമുള്ളവരാണ് എന്നത് ഒരു വസ്തുതയാണ്. കൃത്യമായ സമയത്ത് ശരിയായ ചികിത്സ നൽകിയാൽ ഇവരെ സുഖപ്പെടുത്താനാകും എന്ന അവബോധം 1996ൽ 90/96 രജി.നമ്പറിൽ എസ് എസ് സമിതി ഒരു ചാരിറ്റബിൾ ട്രസ്റ്റായി രജിസ്റ്റർ ചെയ്തു.

ഇപ്പോൾ ഇവിടെയുള്ള സഹോദരീ സഹോദരന്മാരുടെ എണ്ണം 400 ആയി ഉയർന്നു. അവരിൽ നിരാലംബരും മാനസിക ആരോഗ്യം നഷ്ടപ്പെട്ടവരും അനാരോഗ്യരായ ക്ഷയ രോഗികളും ഉൾപ്പെടുന്നു. കുടുംബാംഗങ്ങളും ബന്ധുക്കളും ഉപേക്ഷിച്ച പ്രായമായ സ്ത്രീകൾക്കും പുരുഷന്മാർക്കും ഇവിടെ സംരക്ഷണം നൽകുന്നു . കഴിഞ്ഞ 25 വർഷത്തെ സേവനത്തിനിടയിൽ ഞങ്ങൾക്ക് 650ൽ അധികം സഹോദരങ്ങളെ തിരികെ അവരുടെ കുടുംബങ്ങളിലെത്തിക്കാൻ സാധിച്ചു. ഇതിൽ നേപ്പാൾ , ബംഗ്ലാദേശ് തുടങ്ങി രാജ്യത്തിന്റെ വിവിധ ഭാഗങ്ങളിൽ നിന്നുള്ള ആളുകളും ഉൾപ്പെടുന്നു.

ഈ സമിതിയിലെ ദൈനംദിന ആവശ്യങ്ങൾ നിറവേറ്റുവാൻ ഒരു ദിവസത്തെ ചിലവ് ഏകദേശം 65000 രൂപയോളം വേണ്ടിവരും. ഇവിടുത്തെ എല്ലാ സഹോദരീ സഹോദരങ്ങൾക്കും ഞങ്ങൾ മുടങ്ങാതെ ഭക്ഷണവും മരുന്നുകളും നൽകുന്നു. ഒരു ജനറൽ ഫിസിഷ്യനും സൈക്യാട്രിസ്റ്റും ആഴ്ചയിൽ രണ്ട് തവണ മുടങ്ങാതെ ചികിത്സ ലഭ്യമാക്കുന്നു. കൂടാതെ 5 സൈക്യാട്രിക് സോഷ്യൽ വർക്കർമാരും 6 നേഴ്സിംഗ് സ്റ്റാഫും ഒരു ഫാർമസിസ്റ്റും ഇവിടെ സേവനം അനുഷ്ഠിക്കുന്നു. തുടർ ചികിത്സകൾക്കായി ജില്ലാ ആശുപത്രി, കൊല്ലം, ഗവ. ടിബി ആശുപത്രി, കൊല്ലം, കുടംബാരോഗ്യ കേന്ദ്രം, മയ്യനാട്, ഗവ.മെഡിക്കൽ കോളേജ് തിരുവനന്തപുരം, മാനസികാരോഗ്യ കേന്ദ്രം, പേരൂർക്കട എന്നീ സ്ഥാപനങ്ങളുടെ ചികിത്സാ സഹായവും ലഭ്യമാണ്. ശരിയായ ചികിത്സാ സൗകര്യങ്ങളുടെ അഭാവം മൂലം മതിയായതും തുടർച്ചയായതുമായ ചികിത്സ നൽകാൻ ഞങ്ങൾക്ക് കഴിയുന്നില്ല. ഈ ലക്ഷ്യം നിറവേറ്റുന്നതിനു വേണ്ടി കൊട്ടിയം ഒറ്റപ്ലാമൂട്ടിൽ ഒരു മാനസിക ആരോഗ്യ ക്ലിനിക് പ്രവർത്തിച്ചു വരുന്നു. മതിയായ ചികിത്സ ലഭിക്കുവാനും ചികിത്സയ്ക്കുള്ള കാലതാമസം ഒഴിവാക്കുന്നതിലേക്കുമായി കൊട്ടിയം ഒറ്റപ്ലാമൂട്ടിൽ ഒരു പുനരധിവാസ - മാനസികാരോഗ്യ കേന്ദ്രത്തിന്റെ നിർമ്മാണം 2019ൽ ആരംഭിച്ചു. 7.55 കോടി രൂപ ചിലവ് വരുന്ന ഒരു ബൃഹത്തായ പുനരധിവാസ - മാനസികാരോഗ്യ കേന്ദ്രത്തിന്റെ നിർമ്മാണത്തിനായി 268 ലക്ഷം രൂപ വായ്പ എടുത്തിരുന്നു. ഈ സ്വപ്ന പദ്ധതിയുടെ പൂർത്തീകരണത്തിനായി സഹൃദരായവരിൽ നിന്നും സ്ഥാപനങ്ങളിൽ നിന്നും ഞങ്ങൾ ധനസഹായം അഭ്യർത്ഥിക്കുന്നു. എസ് എസ് സമിതി 25 വർഷം പൂർത്തിയാക്കിയതിന്റെ രജതജൂബിലി ആഘോഷങ്ങൾ 2023 ആഗസ്റ്റ് 19ന് സമിതിയുടെ സഹൃദയ ഹാളിൽ വെച്ച് ആഘോഷിച്ചു. ബഹു. മന്ത്രി ശ്രീമതി ചിഞ്ചുറാണി ചടങ്ങ് ഉദ്ഘാടനം ചെയ്തു. ശ്രീ എൻ കെ പ്രേമചന്ദ്രൻ എം പി, ശ്രീ എം നൗഷാദ് എം എൽ എ, ശ്രീ കെ സോമപ്രസാദ് മുൻ എംപി എന്നിവരും നിരവധി പ്രമുഖരും ചടങ്ങിൽ പങ്കെടുത്തു.